Sul 10 a viz Here 2021

En amzer-se evel ma luske da vont en hent, e teredas d’e gaout un den hag a stouas dirazañ war benn e c’hlin hag a c’houlennas digantañ: «Mestr mat, petra am eus d’ober evit kaout ar vuhez peurbadel da hêrezh?» Jezuz a lavaras dezhañ: «Perak e rez-te mat ac’hanon? N’eus hini mat ebet, nemet Doue hepken. Ar gourc’hemennoù a anavezez: Na lazh ket, na ra ket avoultriezh, na laer ket, na lavar ket falstesteni, na ra gaou ouzh den, enor da dad ha da vamm.»

Hag hemañ da ziskleriañ: «Mestr, kement-se holl am eus miret adal va yaouankiz.»

Neuze Jezuz o vezañ paret e selloù warnañ, en karas hag e lavaras dezhañ: «Un dra a ra diouer dit: kae, gwerzh kement ac’h eus hag en ro d’ar beorion hag az po un teñzor en neñv; ha goude-se, deus d’am heuilh.»

Hemañ avat, glac’haret gant ar gomz-se, a yeas kuit damani-meurbet, rak madoù bras en devoa. Jezuz neuze o vezañ graet sell-tro a lavaras d’e ziskibion:

«Na pegen diaes ez eo d’ar re o deus danvez monet e-barzh Rouantelezh Doue!»

Souezhet-bras e oa an diskibien gant e gomzoù; met Jezuz a lavaras dezho adarre: «Va bugale, na pegen diaes eo dezho monet e-barzh Rouantelezh Doue! Aesoc’h eo d’ur c’hañval tremen dre graoenn un nadoz eget d’un den pinvidik monet e-barzh Rouantelezh Doue!»

Int avat, sabatuet dreist-muzul, a lavare an eil d’egile: «Ha piv eta a c’hell bezañ salvet?»

O vezañ paret e sell warno, Jezuz a lavaras: «D’an dud ez eo dic’hallus, met da Zoue n’eo ket, rak e galloud Doue emañ pep tra.»

Neuze en em lakaas Pêr da lavarout dezhañ: «Setu ! ni hon eus dilezet pep tra hag hon eus da heuliet.» Jezuz a zisklerias: «E gwirionez, m’en lavar deoc’h, n’eus den hag en devo dilezet ti, pe vreudeur, pe c’hoarezed, pe vamm, pe dad, pe vugale, pe barkeier, abalamour din-me ha d’ar c’heloù mat, a gement na resevo ket en amzer-vremañ, kant gwezh kemend-all a diez, a vreudeur, a c’hoarezed, a vammoù, a vugale, a barkeier, gant heskinadurioù, hag en amzer da-zont ar vuhez peurbadel.