Domenica Quarta in Quadragesima
Sul 29 a viz Meurzh 2025 – Pevare Sul ar C’horaiz – Domenica Quarta in Quadragesima
29 Mars 2025 – 4e Dimanche de Carême
*+*+*+*+*+*+*+*+*+*+*+*
Lukaz* 15, 1-3. 11-32
En amzer-se e tostae ar Bublikaned hag ar bec’herion holl ouzh Jezuz evit e glevout. Ma c’hrozmole ar Farizianed hag ar Skribed o lavarout: «Hennezh a zegemer ar bec’herien hag a zebr ganto!» Neuze e lavaras dezho ar barabolenn-mañ: «Un den a oa hag en devoa daou vab. An hini yaouankañ anezho a lavaras d’e dad: »Tad, ro din al lod eus an danvez a zle degouezhout din. » Hag an tad a rannas e vadoù etrezo. Un nebeud deizioù goude, e tastumas ar mab yaouankañ e holl beadra hag ez eas kuit da bell vro; hag eno e foetas e zanvez o ren ur vuhez diroll. Pa voe dispignet pep tra gantañ, e teuas ur gernez vras war ar vro-se, hag eñ e-unan a grogas da santout dienez. Mont a reas neuze d’en em c’hoprañ gant unan eus tud ar vro, hag hemañ e gasas d’e barkeier da vesa moc’h. Karet en divije leuniañ e gof gant ar c’hlos a zebre ar moc’h, met den ne roe dezhañ. Neuze o tistreiñ outañ e-unan e lavaras: »Nag a vevelion e ti va zad o deus bara ouzhpenn o gwalc’h, ha me amañ o vervel gant an naon! Sevel a rin hag ez in da gaout va zad hag e lavarin dezhañ: Tad, pec’het em eus enep an Neñv hag enep dit. N’on ket dellezek ken da vezañ anvet da vab. Gra din evel da unan eus da vevelion. » Hag e savas da vont etrezek e dad. Pell bras c’hoazh e oa p’ en gwelas e dad o teredek, ma savas ennañ truez outañ, e lammas en e gerc’henn hag e pokas dezhañ gant karantez. Neuze e lavaras e vab dezhañ: »Tad, pec’het em eus enep an Neñv hag enep dit, n’on ket dellezek ken da vezañ anvet da vab. » Hogen an tad a lavaras d’e vevelion: »Degasit buan ar sae gaerañ hag he gwiskit dezhañ; lakait ur bizoù en e zorn, ha botoù en e dreid. Degasit al leue lart ha lazhit-eñ; debromp ha greomp fest. Rak ar mab-mañ din a oa marv, ha setu-eñ advevet; kollet e oa ha setu-eñ adkavet. » Hag en em lakajont d’ober fest. Hogen ar mab henañ a oa er park; en ur zistreiñ evel ma tostae d’an ti, e klevas sonerezh ha dañsoù. Hag eñ o c’hervel unan eus ar servijerion a c’houlennas digantañ petra ‘oa kement-se. Hag hemañ a respontas dezhañ: »Da vreur eo a zo distro, ha da dad en deus lazhet al leue lart, dre m’en deus en adkavet yac’h. » Met droug a yeas ennañ ha n’houlle ket monet en ti. Neuze e teuas e dad er-maez d’en aspediñ. Met eñ a respontas d’e dad: »Setu nouspet bloavezh m’az servijan, ha gwezh ebet n’em eus torret da c’hourc’hemennoù, met biskoazh n’ec’h eus roet din-me ur c’havrig d’ober fest gant va mignoned. Hogen kerkent ha m’eo deuet en-dro ar mab-se dit-te hag en deus debret da beadra gant merc’hed fall, e lazhez evitañ al leue lart ! » An tad a lavaras dezhañ: »Va bugel, te ‘zo dalc’hmat ganin, ha kement am eus-me a zo dit-te. Met ret e oa ober fest hag en em laouenaat, rak da vreur amañ a oa marv, hag advevet eo; kollet e oa, hag adkavet eo ! »»
Oferenn eus an Usus Antiquor
kv al load « Introïbo «
+ Usus Antiquior
Domenica Quarta in Quadragesima
Digoradur
Izaia 66, 10 ha 11
Lætáre, Ierúsalem : et convéntum fácite, omnes qui dilígitis eam : gaudéte cum lætítia, qui in tristítia fuístis : ut exsultétis, et satiémini ab ubéribus consolatiónis vestræ. +Salm 121,1 / Lætátus sum in his, quæ dicta sunt mihi : in domum Dómini íbimus.
Bezit laouen gant Jeruzalem! En em vodit, c’hwi holl hag he c’har! Tridit a levenez en abeg dezhi, c‘hwi holl hag hoc’h eus douget he c’hañv. S. / Na laouen on bet p’eo bet lavaret din: «Deomp da di an Aotroù!»
Goueler ar sizhunvezh
D’an 30 a viz Meurzh
– En III de kantved, distro da Zoue ene, sant Rieul, eskob Senlis. Bez’ e voe unan eus avielourion gentañ Gallia da vare sant Denez Pariz ha sant Lukian Beauvais.
– E 462, sant Mammertin, abad. Kanttroet gant sant Garmon ez eas da vanac’h hag e voe diuzet da abad manati Sant-Kosma-ha- Damian Autesiodurum.
– E 649, er Menez Sinai sant Yann Klimak. Ganet e Bro-Balestina en em dennas e gouelec’h Menez Sinai goude e studioù. E lesanv klimak, anv o talvezout « ar skeul », a zeu eus e oberenn Skeul ar Baradoz a savas evit stummañ ar venec’h ma tispleg an hentadur speredel e doare ur bignadenn davet Doue dre dregont derez.
– E 1472, e Vercelli er Piemonte, ar gwenvidig Amede IX, dug Bro-Savoa. Lezel a reas war e lerc’h brud e largentez e-keñver ar beorion, an intañvezed hag an emzivaded.
– En Iwerzhon, er VI vet kantved, sant Fragus (Gourost), abad.
– En Iwerzhon, er VII vet kantved, sant Cronan, diskibl sant Komgall e Bangor.
– En Iwerzhon, war-dro 735, sant Tola (Lt Tolanus), penitiour, eskob Clúain Ioráird. Lesanvet e voe « Milour mat ar C’Hrist ». Kas a reas menec’h dre Europa a-bezh.
D’an 31 a viz Meurzh
– En 2 eil kantved, e Roma, merzherenti santez Balbina, gwerc’hez, merc’h sant Kirin.Gouestlet eo dezhi un iliz-kardinal war an Aventin.
– Er bloaz a c’hras 250, sant Akaz, eskob Antiokeia-Pisidia. Bez’ e voe harzet da-geñver heskinadeg Decius hag e respontas gant kement a awen d’ar c’hoñsul Marsian ma voe loasket da vont dieub.
– War-dro 420, en Argol e Persia, sant Benjamin, diagon. O vezañ ma ne ehane ket da brezeg komz Doue da vare ar roue Bahron V e voe sanket korzennoù dindan e ivinoù hag e beurechuas e desteni a feiz dre ar verzherenti.
– Er VIII vet kantved, en Alamagn, sant Agilolf, eskob kentañ Kolun. Merzheriet eo bet dindan Charlez Martel. Brudet evit santelezh e vuhez hag evit e brezegerezh e vije bet manac’h da gentañ hag abad Stavelot-Malmedy, hiziv e Bro-Belgia.
– E 1147, distro da Zoue ene sant Gwion, abad breizhat. Manac’h-beleg e Premontre dindan sant Norberzh, penitiour e koadeg Artez, savour abati Vicognes e-kichen Valenciennes.
– En Iwerzhon, en VIII vet kantved, santez Maria, maouez santel.
D’ar 1 añ a viz Ebrel
– E 190, distro da Zoue ene sant Meliton, eskob Sardes e Lidia, hiziv e Turkia. Sevel a reas oberennoù e-leizh evit ar feizidi en o zouez ur brezegenn a-zivout Pask a awenas al liderezh bizantat.
– War-dro 257, merzherenti sant Venañs, eskob kentañ Salona e Dalmasia. Treuzlec’hiet e voe e relegoù da Roma war urzh ar pab Yann IV (640-642) war un dro gant re merzherion all eus Dalmasia hag Istria a vez graet koun anezho: ar sent Anastazius, Maurus, Paulinianus, Telius, Asterius, Septimius, Antiochianus ha Gaïenus.
– E 305, e Kêr-Desalonikê, da vare Diocletianus, merzherenti ar santezed Agape ha Chionia, gwerc’hezed. Kondaonet e voent da vezañ losket ez vev dre ma nac’hent debriñ kig aberzhet d’an idolennoù.
– War-dro 421, ganedigezh en neñvoù santez Mari an Egiptianez, penitiourez.
Goude ur vuhez diroll en Aleksandria e voe gonezet d’ar feiz e Jeruzalem da-geñver gouel ar Groaz Klodus. Neuze en em stalias en tu-all d’ar Yordan da ren ar vuhez penitiour. Sebeliet e voe gant sant Zosim a voe skoazellet dre vurzhud gant ul leon a gleuzias ar bez e douar krin ha kalet ar gouelec’h.
– E 619, e Bro-C’hall, sant Gwalarig pe Valeri (Gl. Valéry), abad. Kregiñ a reas e vuhez manac’h en Issoire, da c’houde en Autesiodurum a-raok mont da Luxovium gant sant Koulman. Diwezhatoc’h e tiazezas, lec’h m’emañ bremañ Saint-Valery-sur-Somme, manati Leuconaus (Leuconay) a voe renet war e lerc’h gant sant Blimont ha pourvezet gant ar roueed c’hall Klotar II, Dagoberzh ha Karloman.
– E 850, sant Makarios, higoumen manati Peleceta e-kichen Kêrgustentin. Skarzhet e voe alese da vare an impalaer Leon an Armeniad dre ma talc’he da gehelerezh ar skeu- dennoù santel.
– E 1132, sant Hugues, eskob Grenoble. Labourat a reas da adreizhañ buhezegezh ar gloer hag ar feizidi o lakaat da dalvezout disentezioù ar pab Gregor VII hag e skoras azginivelezh ar vanac’helezh o tiazezañ un abati beneadat e Bro-Chalais hag o vleniañ sant Bruno hag e geneiled betek gouelec’h ar Chartrouzi.
– E 330, distro da Zoue ene sant Enni, eskob Naoned.
– E Breizh, sant Onnev, lesanvet Penneg, penitiour hag eskob Kernev, paeron parrez An Eskevien er C’hab-Sizhun.
– E Kembre, V vet -VI vet kantved, sant Tewdrig (Teodorig) pe Teudar, tiern aet da benitiour. Aet e oa war an oad pa zilezas e garg a diern e Morgannwg (Glamorgan) evit en em dennañ en digenvez ha ren ar vuhez penitiour e Tintern. Da vare aloubadegoù ar Saksoned avat e kemeras en-dro penn e bobl evit o argas. Gloazet d’ar marv gant un taol goaf e varvas hag e voe sebeliet e Mathern, e-kichen Chepstow, lec’h ma vez miret e relegoù en iliz dediet dezhañ.
– En Iwerzhon, e Ardpatrick er Munster, e 1129, sant Kelleg, anvet eskob Ard Macha e 1105 d’e 26 bloaz, e voe adreizher Iliz Iwerzhon.
D’an 2 eil a viz Ebrel
– E 306, e Kaezarea Palestina, merzherenti sant Apphianos. Da vare an impalaer Maximinius Daia e nac’has aberzhiñ d’an idolennoù. Lakaet da zeviñ evel ur flammerenn vev e talas dre vurzhud ouzh ar marv ha neuze e voe taolet er mor.
– E 307, e Kaezarea Palestina, merzherenti santez Teodora, gwerc’hez. Genidik eus Tir e kredas da vare an hevelep heskinadeg, kevarc’hañ feizvonnourion el lezvarn ha goulenn rad o fedennoù ; neuze e voe kaset dirak ar prefed Urbanus. War e urzh e voe roget he c’horf hag e voe taolet er mor.
– E 554, sant Victor, eskob Capua e Campania. Sevel a reas kalz a oberennoù relijiel hag ez eo dezhañ moarvat e tleomp an droidigezh klok kentañ eus an Testamant Nevez e latin.
– E 1458, e Foligno e Perugia, ganedigezh en neñvoù ar wenvidigez Alsesandrina, leanez eus urzh Santez-Klara meulet gant he c’hoarezed evit he santelezh.
– E 1507, e Plessis-lès-Tours, sant Frañsez a Baol, penitiour. Hag eñ diazezour Urzh ar vMinimed e Calabra ma roas dezho ar gourc’hemenn da chom hep perc’hennañ netra ha da zebriñ boued koraiz a-hed ar bloaz. Mervel a reas p’edo o tistreiñ da vezañ roet ar sakramantoù d’ar roue Loeiz XI a Vro-C’Hall a oa war e dremenvan.
– E 629, sant Eustaz, abad, genidik eus Burgondia, diskibl ha warlerc’hier sant Koulm e Luxovium. Lakaat a reas hêrezh manac’helezh Iwerzhon da deurel frouezh er c’hevandir ha meur eus e venec’h a zeuas da vezañ eskibion evel ar sent Gauberzh, Romarig, Amatus.
– En Iwerzhon, er VI vet kantved, santez Bronac’h pe Bromana Glen-Seichis (Bromana, Bronacha, Bronanna), gwerc’hez.
– E Bro-Skos 870, merzherenti santez Ebba an hini Yaouank, abadez Coldingham, lazhet war-un- dro gant he c’hoarezed. Tra ma tostae an Daniz e troc’has he fri hag he gweuz uhelañ. He merc’hed a reas kement-all. Mervel a rejont e tangwall o manati.
D’an 3 a viz Ebrel
– Er bloaz a c’hras 125, e Roma, merzherenti sant Sikst I añ , pab. Diuzet e 115 evel c’hwec’hvet pab goude sant Pêr ez echuas er verzherenti, da vare an impalaer Adrian, an dek vloaz a dremenas e penn an Iliz.- E 886, distro da Zoue ene sant Jozef ar Meulganour, beleg ha manac’h e Bro-C’hres. Genidik eus Sikilia e tec’has d’ar Peloponnez abalamour d’an aloubadegoù muzulmat hag ez eas da vanac’h e manati Latamos e Tesalonikê. Da vare an hande ikonoklast e voe kaset da Roma evit kelaouiñ ar pab Gregor IV ha gounit bezañ harpet gant ar C’Hornôg. Paket gant morbreizherion arab e vo kondaonet d’ar c’harkan hogen ne baouezas ket da veuliñ Doue. Dieubet e tizhas Kêrgustentin lec’h ma savas meul-ganoù ha pezhioù liderezel meurdezus.
– E 1253, e Bro-Saoz, sant Richarzh, eskob Chichester. Daoust ma voe dioueret e-pad pellik amzer eus e vadoù gant ar roue Herri III e teuas a-benn da ren e eskobiezh gant furnez ha gred.
– E Breizh, e dibenn ar V vet kantved pe e deroù ar VI vet kantved, sant Izuned pe Iduned, manac’h e Landevenneg, diskibl sant Gwennole, bet penitiour e Kastellin. Bez’ e vefe breur santez Tunvell, mamm sant Meven.
– En Iwerzhon 743, sant Cuanan, abad.
D’ar 4 a viz Ebrel
– E 636, distro da Zoue ene sant Izidor, eskob Sevilla war-lerc’h e vreur sant Leandr, doazhour eus an Iliz. Lezet en deus kalz a levrioù a helennegezh. E vreur Fulgentius hag e c’hoar Florentina zo bet savet ivez d’an aoterioù.
– Er VI vet kantved, e Persia merzherenti santez Pherboutha ha santez Mekadostha, he c’hoar, hag o matezh. Edont e servij rouanez Persia pa voent tamallet e gaou da vezañ lakaet homañ da evañ un died hud. Aterset e voe hudourion a zisklêrias e oa ret, evit terriñ ar barr e tremenfe ar rouanez hag he heul etre korfoù didroc’het ar maouezed yaouank. Neuze e voent heskennet war stern hag e tremenas ar rouanez hag he re dre an trepas gwadeg-se.
– E 1105, ar wenvidigez Aletta, mamm sant Bernez. Merc’h kont Montbard e Burgondia e timezas d’he femzek bloaz gant Técelin, aotrou Fontaines e- kichen Dijon. Ren a rejont ur vuhez santel hag e c’hanas c’hwec’h mab, en o zouez sant Bernez a sachas e bemp breur war e lerc’h da abati Citeaux, hag ur verc’h, santez Humbelina, a voa manac’hez e Juilly. Relegoù santez Aletta a voe treuzkaset da abati Clairvaux e 1250.
– E 1589, e Sikilia, sant Benead ar Morian, Patrom an Afrikan-amerikaned. E dud a oa bet degaset evel sklavourion eus Afrika da vMessina en Sikilia. Dieubet d’e 18 bloaz e labouras en un atant a-raok mont gant ur strollad penitiourion eus urzh ar Vinored e Palermo lec’h ma skedas e santelezh e gwazerezh Doue hag e vreudeur.
– E 1919, e Fatima er Portugal, sant Francisco Marto. Dezhañ, d’e c’hoar Jacinta ha d’o c’henitervez Lúcia, anezho tri vêsaerig, en em zisouezas dezho ar Werc’hez Vari etre an 13 a viz Mae hag an 13 a viz Here 1917. Kannad kalonek ar Werc’hez e oa. Kuñv, habask, dalc’hus er amrou, feal d’ar bedenn, e varvas d’e 11 bloaz goude ur c’hleñved berr. Santelezet eo bet war un dro gant e c’hoar Yasenta d’an 13 a viz Mae 2017 gantar Pab Frañsez.
– Tremenvan sant Ambroaz Milano a vez lidet d’ar 7 a viz Kerzu da zeiz e urzhidigezh eskob.
– En IX vet kantved, sant Alvan (Gl. Alman), eskob Naoned, didreveg en Anjev, savour abati Saint-Jean-des-Mauvrets.
– En Iwerzhon, war-dro 550, sant Tigernach (Iw. Tighearnach) pe Tierneg, ✝, eskob iwerzhonat. Filhor santez Berc’hed e vefe. Skrapet gant morlaeron ha kaset da Gembre, ez eas eno da vanac’h. Goude distreiñ da Iwerzhon e voe manac’h e Clúain Eois hag e voe anvet eskob Clochar (Clogher) war-lerc’h sant MacCartheann (Makartin).
– E Breizh, e Roazhon e 1774, distro da Zoue ene an Aotrou Joseph-Augustin Bourseul, beleg ganet e Kemperle e 1704, misioner hag aluzenner Ospital Sant-Erwan e Roazhon.
D’ar 5 a viz Ebrel
– E 305, e Tesalonikê e Makedonia, da vare heskinadeg Diocletianus, merzherenti santez Irena, gwerc’hez. Dre m’he doa kuzhet levrioù santel ha ma nac’he aberzhiñ d’an idolennoù e voe diskouezet en noazh en ti gasterezh ha taolet en ur c’horadenn war urzh ar prefed Dulcetius en doe lazhet endeo he div c’hoar Agape ha Kionia.
– Deizlid Merzherion Persia, lakaet d’ar marv e 344 e Seleukia Mezopotamia, anezho 111 gwaz ha 9 maouez. Dre ma nac’hent azeuliñ an heol e voe karc’hariet beleion, diagoned ha gwerc’hezed kensakret, war urzh ar roue Sapor II, e toulloù-bac’h lous hag hep sklêrijenn e-kerzh c’hwec’h miz. Neuze e voent dibennet tra ma veze taolet kristenion-all en tan.
– E 647, e Bro-Saoz, ganedigezh en neñvoù santez Ethelburg, abadez. Hag hi merc’h Ethelbert, tiern Kent, gwreg sant Edwin, tiern merzher Norzumbria. Intañvezet e savas ul leandi e Lyminge e Kent.
– E 1258, distro da Zoue ene santez Juluana Menez Kornilhon, gwerc’hez. Leanez Sant-Eosten, priolez manati Menez Kornilhon en eskobiezh Luik marvet penitiouez e Fosses er Brabant, e labouras evit diazezañ gouel ar C’horpus Christi pe gouel ar Sakramant.
– E Breizh, sant Kalanel, kehelet er barrez a zoug e anv, Kalanel, gwezhall trev eus Pluskelleg e Kernev.
– E Kernev-Veur, sant Probus ha santez Grasia e wreg, feizvonnourion.
– E 1669, ar bac’hiadez Mari a Sant Jozef, Marie Menard eus he anv plac’h yaouank, leanez. Bez’ e voe superiorez kouent Beneadezed ar C’halvar e Sant-Sir Roazhon, kevrinourez. He zad a oa an den a lezenn santel ha gouiziek Klaoda Ménard.
– E 1419, e Gwened : tremenvan sant Visant Ferrer a vez lidet d’ar 5 a viz Mae.
http://marikavel.org/documents/buhez-ar-zent.htm
*
