Gant ur ganenn hengounel e Bro-Wened, dezhi ar sonerezh evel ma veze kanet gant Marianna Goalher eus Lokmaria Kistinid. Komzoù lakaet e peurunvan ha adkempennet gant Tiegezh Santez Anna. Deuit d’e bleustiñ e Lann-Anna, e-pad amzervezh ar C’horaiz pergen, d’ar gwener.
Da ganañ o kregiñ troet davet an aoter pe ur skeudenn eus ar Salver :
O Kristenion garantezus,
Holl war un dro, deomp gant glac’har,
Da heuliañ hor Salver Jezuz,
War an hent a gas d’ar C’Halvar !
Diskan : E wad a verk e gammedoù, deomp d’o gwalc’hiñ gant hon daeroù !
En ur vont eus un arsav d’egile : Gwerc’hez Vari, Mamm druezus, ra vezo goulioù Jezuz merket don en hor c’halon.
O tegouezhout : Ni hoc’h azeul, o Krist hag a ro meuleudi deoc’h ! R/ Dre m’hoc’h eus, dre ho Kroaz Santel, dasprenet ar bed !
Kan an arsav
Pater, Ave, Gloria…
Da echuiñ Ho pet truez ouzhimp Aotrou ! R/ Ho pet truez ouzhimp !
Fidelium animae per misericordiam Dei requiescant in pace R/ Amen
- 1añ arsav
Gwerc’hez Vari…
Ni hoc’h azeul…
Dirak Pilat, sed Mab Doue :
Kondaonet d’ur marv euzhus.
Aotrou Jezuz, hor gwir pare,
Bezit ‘vidomp trugarezus !
Diskan : E wad a verk e gammedoù, deomp d’o gwalc’hiñ gant hon daeroù !
Pater noster… Ho pet truez… Fidelium
- 2l arsav
War e zivskoaz e samm Jezuz
Ur groaz ponner, hep klemm ebet.
Gant e skoazell, dougomp gredus,
Hor c’hroaz hiziv, warc’hoazh bepred !
- 3de arsav
Jezuz a gouezh dindan e Groaz
Daoust m’emañ gantañ nerzh Doue.
Sellomp, pec’herion hep ankouazh
Ouzh e c’houzañv ken dizoare.
4re arsav
Jezuz a gav e Vamm garet,
Evito pebezh tarzh-kalon !
Evit skañvaat o gloaz kalet,
Piv ne c’houlennfe ket pardon ?
5vet arsav
Perak Simon en ho laker
Da zougen ar Groaz gant Jezuz ?
Dre hor poanioù e pep amzer,
Ni ‘ fell dimp dougen Kroaz Jezuz !
6vet arsav
Reiñ a rit da Veronika
Ho tremm louc’het war he lien.
Plijet ganeoc’h dont da verkañ
En hor c’halon ho skeudenn wenn.
7vet arsav
‘Vit an eil gwech e kouezh Jezuz
Kent pell e sav, Eñ Mestr ar bed.
Pa gouezhomp-ni en tech mantrus
Savomp prim e nerzh ar Spered !
8vet arsav
- Merc’hed Sion, eme Jezuz,
Gouelit warnoc’h, ket warnon-me.
Gouelomp ‘ta d’hor pec’hed skrijus,
Ma teuy ar c’hras en hon ene.
9vet arsav
Un trede gwech dindan e samm
Setu c’hoazh hor Salver kouezhet.
Betek ar fin, diouzh va drouklamm
Ganeoc’h Jezuz ‘on dieubet.
10vet arsav
Lamet digantañ e zilhad
En em zigor e c’houlioù :
Kristen, laka poan evit mat
Da lemel kuit da walldechoù.
11vet arsav
Ha tachet e voe d’hor Roue
E zaouarn, e dreid hep termal.
Pebezh spouron, rak me bemde(z)
O pec’hiñ, e ran kement-all !
12vet arsav
War-dro teir eur goude kreistei(z)
E varv Jezuz er vrasañ poan
Pa vo va zro, o va Doue
Evidoc’h mervel a vennan !
13vet arsav
Etre divrec’h e Vamm garet,
Sellomp ouzh Jezuz hep buhez
Gre/omp kañv d’ar gaezh vamm gloazet,
Roomp d’he Mab hor c’harantez !
14vet arsav
Lakaet er bez gant liñselioù,
Jezuz ‘ vo bev a-benn tri dei(z).
Ha ni, marvomp d’hor pec’hedoù,
Bepred bevomp evit Doue !
Diskan evit echuiñ : Hent ar C’Halvar zo hent an Neñv, diskouezet d’an holl gant Doue !
|
|